***

Тэвчихээс өөрийг үл хийнэ.
Тэр цонхны дэргэд ганцаараа сууна.

Цаана нь

Тэнгэрээс юу ч юм унана.

Цаг хугацаа зогсож

тамхины утаа танхимын голд бүжиг эргэнэ.

Түр салалт их хайрыг бадрааж өнгөц хайрыг унтраадаг...

Өвлийн сайхан өглөө

Өглөөний тунгалаг агаар хийгээд
Үүрийн шаргал наран чамайг минь гэрэлтүүлжээ
Нүдээ анин цээж дүүрэн амьсгалахдаа
Нарны илчийг хацрандаа шингээн мэдэрчээ...

Би мэдэрч байна

Гэрэлтэгч бяцхан охин минь, одоо бүх юм сайхан болно
Гэрт чинь сэтгэл татам нэгэн хүү ирнэ. Дэргэд чинь сууна.
Гал түлж, чамд хөгжим тоглож өгнө.
Гараас чинь атгаад л тэр цаг хугацааг зогсооно.

Ганцхан удаа инээгээч...

Нулимс шиг шорвог далайн гүнд
Нуугданхан байгаа загас мэт сэтгэл
Далай шиг нүд алдам гуниг дунд
Давалгаа хүлээн хөвөнхөн байнам

Хэзээ чи дарвуулыг минь дурлалын салхиар үлээх вэ?
Хичнээн жил би чамайг мөрөөдөнхөн хөвөх вэ?
Далдхан гунигаас үргээж эрэг рүү намайг дөхүүлэх
Давалгаа болгож над руу ганцхан удаа инээмсэглээч

Чамтайгаа шүлэг шиг амьдарна...

Би яг л энэ шүлэг шиг амьдарна...

Навчсын сэрчигнээ хийгээд шувуудын шулганах чимээтэй
Намрын хонгор салхи хацар илбэхэд би сэрнэ
Томоо нээсэн цонхон цаана хүүхдүүд гүйлдэх нь жаргалтай
Толины өмнө эхнэр минь үсээ самнах нь үзэсгэлэнтэй

Зүүдэнд ирсэн айдас үргээд л нисэх тэр мөчид
Зөөлөн инээмсэглэх хайр хөнжил сөхөн орж ирнэ
Өчигдөр бид хоёрын үнсэлцсэн хөгшин модны сүүдэрт
Өхөөрдөм үрс минь яг л шувууд шиг шулганах сонстоно

Би энэ шүлэгт дуртай...
Энэ шүлгийг би чамаараа төсөөлдөг...
Хэн юм бол гэж эргэлзээд хэрэггүй ээ
Чи минь шүү дээ... Чи минь...

***

Инээмсэглэлийг чинь энэ хэвээр нь хадгалж

Илүү биш, дутуу биш

иймээр чинь л чамайг хайрлаад

Барьж чадахгүй ч

ядаж шүргэхсэн гэх хүслээ авч үлдээд

Байхаас чинь байхгүй хүртэлх чамайг

дөнгөж таньж мэдрэх

Хонгор минь ямар сайхан юм бэ!

Чи мэдэх үү?

Чи санаж байна уу
Бид хоёр хөтлөлцөөд хамт алхаж байсныг
Чи мэдэх үү
Би чамайг хардаг байсныг

Чи санадаг уу
Би чамайг анх хэзээ үнссэнийг
Чи анзаарсан уу
Би чамд сайн байсныг

Урьд нь чи бас би
Ертөнцийн хоёр захад
Хориотой мэт оршдог байлаа
Одоо харин хамтдаа
Хил залган тусгаар тогтножээ

I hate you but I love you...

Чи яг л тэнгэрт нисэх шувуу мэт ихэмсэг
Чиний дэргэд би бяцхан жаал мэт гэнэн

Хоёр мянга арван нэгдүгээр оны сүүлийн тэмдэглэл

Өнөөдөр 2011 оны 12р сарын 31. Хүн төрөлхтөн он цаг хугацааг тоолж эхлээд бүхэл бүтэн хоёр мянга арван нэгэн жилийг ардаа орхижээ. Энэ урт удаан хугацаанд болсон үйл явдлыг тодорхой цаг хугацаатай нь мэдэж тэмдэглэж байхын тулд нэгэн жаран, нэгэн зуун, нэгэн мянган гэж ангилжээ. Миний хувьд, бидний хувьд хоёр дахь мянган жилийн төгсөл үед энэ дэлхий дээр ирж одоо гуравдугаар мянган жилийн эхэн үед амьдарч байна. Зуунаар ярьвал хорьдугаар зуунд төрж хорин нэгдүгээр зуунд амьдарч явна. Хэрэв чадал байвал дараагийн зуун жилийг үзэж ч болох юм. Гэхдээ бараг л боломжгүй зүйл биз. Бидний үр хүүхдүүд л хорин хоёрдугаар зуунд аж төрөх болно.
Тэгээд бодохоор бид үнэхээр өчүүхэн богино хугацаанд л энэ дэлхий гэгч аугаа том гараг ертөнц дээр хүн гэж амьдардаг байх нь. Тэгсэн хэрнээ энэ богино хугацаанд үнэхээр их зүйл тохиолдох юм.

Ирсэн...

Үргэлж л хөгжимд дурлагч нэгэн бүсгүй байжээ
Өглөө бүрийг инээмсэглэн угтдаг байж гэнэ
Үүрд хамт байх ханхүүгээ мөрөөдөж
Өдөр бүр түүнийгээ л зурдаг байжээ...

Хүнийх...

Чи шүлэгт дуртай шиг
Би чамд хайртай
Би чамд хайртай шиг
Чи бусдын шүлэгт дуртай

Чи хэн нэгний бичсэн шүлэгт дуртай шиг
Би чамайг хайрладаг
Чи хэн нэгний бичсэн шүлгээс өөрийгөө мэдэрдэг шиг
Би чамайг тэвэрдэг
Чи хэн нэгний гунигаа шингээсэн шүлгээс таашаал авдаг шиг
Би чамайг шунан хүсдэг
Чи хэн нэгний хамгийн гэгээлэг шүлгээс уйтгар, ганцаардлаа олж хардаг шиг
Би чамаас явдаг
Чи бусдын шүлэгт дуртай шиг
Би чамд хайртай.

Америкт бичсэн тэмдэглэл #5 буюу эрх чөлөөг мэдэрсэн нь

Сайн байна уу, сайн байна уу, сайн байна уу? Америкт бичсэн тэмдэглэл маань үргэлжилж байна... Энэ удаа Нью Йорк хотоор аялсан сүүлчийн өдрүүдийнхээ тэмдэглэлийг бичье.

...Өглөө сэрээд, би чинь хаана байгаа билээ, гэртээ ирчихсэн билүү, юу билээ гэж хэсэг нойрмоглон бодож гайхлаа. Урд шөнө гэртээ харьчихсан, гэрийнхэнтэйгээ уулзаж инээлдэж байна гэж зүүдэлсэн болохоор л тэр...
Босох уу байх уу гэж хэсэг хэвтсэний эцэст гэнэт орноосоо суга үсрэн босч угаалгын өрөөрүү орлоо. Сайхан гэгч нь шүршүүрт орох зуураа энэ том хотын иргэн болоод амьдарч байгаа ч юм шиг сэтгэгдэл төрж билээ.
Уснаас гарч ирээд 2 найзаа дуудангаа өрөөнийхөө хөшгийг нүд гялбуулан нээж Нью Йорк хотын цоо шинэ өглөөтэй дахин мэндэллээ. Тэнгэр цэв цэлмэг, өглөөний нар өндөр барилгын цаагуур наагуур арай хийн цухуйна. Тэгээд л өнөөх дүнгэнэсэн нүсэр чимээ, нааш цааш сүлжилдэн хурдан алхах хүмүүс, машин тэрэг, унаа хөсөгүүд...
Шинэ өглөөний мэнд Нью Йорк...

Тэр бол...

Тэр бол
Амьдран тэсэх,
Амьд үлдэх
цорын ганц шалтгаан минь.
Аз жаргалтайгаар,
Сэтгэл хангалуун үхэх
цорын ганц боломж минь.
Хүсэл мөрөөдөлдөө хүрэх
Миний ганцхан найдвар
Хүлээх итгэл,
хүрэх оргил минь.

Тэр бол
Миний сонсдог дуунуудын
далд инээмсэглэл шиг
цээж цэлмэтэл мандах
Миний л хардаг нарнуудын
далд цацраг шиг
тийм зөөлөн илчтэй.
Миний мэдэрдэг догдлолуудыг
нууцхан шүргээд
зөөлөн савлах дүүжин дээрх
Миний л зүүдэнд ирдэг
хайр хүрэм,
ганцаардсан бяцхан охин.

Нүд

Чи их хөөрхөн
Чиний царайнд би дурласан
Чи их ухаалаг
Чиний ухааныг би биширсэн
Чи үнэхээр эелдэг
Чиний занд би татагдсан
Чи үнэхээр зоригтой
Чиний зоригийг би үнэлсэн

I'm so glad that you're my Radio...

Надад нэг радио бий
Намайг дуулуулж уйлуулах нь ч бий
Нүдрүү нь эгцлэх хүсэл бий ч
Нүүгээд явчих зориг түүнд бий...

Гучин жил хамт байхсан...

Миний радио надтай дугарахаа больсон
Харин би түүнд итгэж чадахгүй гайхсан
Гурав хоносон дөрөв хоносон би хүлээсэн
Харин тэр надад юу ч хэлэхгүй хэвээрээ...

Тэр эвдэрсэн бол яана
Би итгэхгүй байна чамд
Дуулахгүй байна чи
Дугарахгүй бол би яана...

Өнгөрсөн жилүүдийг
Дурсаж би уйлсан
Одоо болтол чи сэрэхгүй унтсаар...

Надад хайртай гэсэн...

Тэр нэг хүнийг сонсох тусам улам татагдаж эхэлнэ
Тэр нэг хүнийг харах бүр салах тухай бодол багасна

Тэр нэг хүнээс алсхан байя гэвч үл чадна
Тэр нэг хүнийг мартъя гэвч зүрх шанална

Хамтдаа эсвэл тусдаа аль нь үл мэдэгдэнэ
Хайртай эсвэл үгүйг одоо би гайхна

Хайртай байсаан гэж харин бардам хэлнэ
Хамгаас илүү чи л сэтгэлийг минь өвтгөнө...

Урд шөнө цас орсон

Гараад ирсэн чинь цав цагаан
Гараа тосоод зөндөө зогссон
Гадаа гарсан чинь нам гүм
Ганцхан удаа санаа алдсан

***

Миний сонсдог дуу шиг
тийм бүсгүй
Миний дурласан дуу мэт
тийм бүсгүй
Сонсоод уярдаг дуу шиг минь
тийм бүсгүй
Сонсох тусам улам татагдах дуу мэт
тийм бүсгүй...